PARTÎYÊ SÎYASÎ Û RAYVISTINÊ SIVÎLÎY: GERE HEMVER BÊEXLAQÎYA VERVA CENAZEYAN, MA VENGÊ XO BERZ BIKERÊ
Nêrazîbîyişê hemver bêexlaqîya verva cenazeyan êy dewleta tirke, dewam kenê.
Partîyê Sîyasîyan û sazîyê sivîlan êy tirkîya vat; Gere verva ma nêbê ortaxê ney şermî û her kes verva na bêexlaqîye vengê xo berz bikero.
Nêrazîbîyişê hemver wehşet û bêexlaqîya dewleta tirke ya verva cenaze û mezelan, dewam kenê.
Partîyê sîasî û rayvistinanê civatî, êrîşê verva cenazeyan zê wehşetî bi name kerd û bi eşkerayîyêke veng ro raya pêroyî kerd;
“Bêvengî qebûlkerdiş o. Gere ma nêbê ortaxê na bêexlaqîye”.
VERVATOXÊ HDK ÎDÎL UGURLU: GERE MA BI BÊVENGÎYA XO NÊBÊ ORTAXÊ NA HOVÎTÎYE
Vervatoxê Kongreya Demokratîke ya Şaran HDK, Îdîl Ûgurlu:
Di heme bawerî û civatanê dinya de verva, cenaze û mezelan rêzdarîye est a.
Her mezelêke, seba civatî navendê hafizaye yo. Îqtîdarê AKP seba ke hafizaya Şarê Kurdî çinê bikero nêy êrîşan pêk ano.
Na rewşe bêrêzî û bêexlaqîya verva şarê Kurdî yê AKP nîşan dana. Gere ma bi bêvengîya xo civat nêbê ortaxê na hovîtîye.
ENDAMÊ ANYAKAY-DER’E HASAN AVRAS; GERE MA VENGÊ XO BERZ BIKERÊ
Endamê Komeleya ANYAKAY-DER’e, Hasan Avras:
Roca ke êy cenazey Goristan ra amey vetişî ma vengê xo berz bikerdayêne, ewro êy cenazey Kîlyos de bi no awa nîyameyêne binaxkerdene. Keso ke xo ra vano ez însan a, gere verva ney wehşetî vengê xo berz bikero. Çîyo ke ameyo kerdişî sûcê verva merdimayîye yo. Bêvengmendiş ortaxî ya.
HEMSEROKÊ SYKP CAVÎT UGUR: PLANA TÊKBERDIŞÎ YA DEWLETE DEWAM KENA
Hemserokê Partîya Newe ra Awankerdişî ya Sosyalîste, Cavit Ûgur :
Di feraseto binkeyîn yê na dewlete de qirkerdiş, qetlîam, vîndîkerdiş û wehşetîy tim est bîy. Êrîşê mezel û cenazeyan zî dewamê na polîtîkaya wehşetî yo. Di tu bawerî, ol û felsefeyêke de destûr nêdeyeno na hovîtîye. AKP ya ke bi îstîsmarê dînî ameya îqtîdar, cenaze û mezelanê Şarê Kurdî rê zî tehamûl nêkena. Verva Şarê Kurdî,Plana têkberdişî yena domnayişî.
SEROKA PARTÎYA KEDE EMEP, SELMA GURKAN: PERGALA YEWMERDIMÎ TU ERJ Û EXLAQÊKE NAS NÊKENA
Seroka Pêroyî ya Partîya Kede EMEP’e Selma Gurkane.
Îşkenceyê ro cenazeyan û êrîşê verva mezelan, encamê ferasetê dişmentîya verva Şarê Kurdî, yê.
Di heme tarîxê merdimayî û şerran de zî, hiqûqêko ke verva merdeyan yeno pêkardişî est o. Pergala yewmerdimî ya tirkîya, na di na mijare de zî tu erj û exlaqêke, nas nêkena. Verva ney ferasetî cewabo tewir baş, demorasî, zeypêyî û azadîyan de îsrarkerdiş o. Seba naye zî, gere ma tekoşînêka hembare de bêrê pêhete.
HEMSEROKÊ ESP,ŞAHÎN TUMUKLU: ÊRÎŞÎY KAHNEŞOPÎYÊKA DEWLETE YÊ
Hemserokê ESP Şahîn Tumuklu:
Nêy êrîşî tenê bi AKP sînorkerdey nîyê. Osmanîyan ra na heta, zê kahneşopîya dewlete dewam kenê. Şahkuluyî ra heta Seyîd Rizayî, mezelê xeylê kesanêy ke seba azadîyan tekoşîne daya, nînê zanayiş. Verva heme kesanêy ke hemver zilmê înan bivinderê, hema polîtîka ameya domnayişî. Ewro zî, êy ke seba azadîye tekoşîne danê Kurd ê. Bi no sebeb zî hedefa hovîtî û wehşetî, Kurd ê.
HEMSEROKÊ RAYVISTINA STEMBOLÎ YÊ HDP ERDAL AVCI:
ÎQTÎDAR KURDAN RA VANO “HEQÊ TO YÊ DEFINBÎYIŞÎ ZÎ ÇÎN YO”
Hemserokê Rayvistina Stembolî yê HDP Erdal Avci:
Îqtîdarê AKP bi mezel ra vetiş û remnayişê cenazeyan, îmzaya xo eşte bin sûcê tewir pîlî yê tarîxê merdimayîye. Îqtîdar bi na helwesta xo Şarê Kurdî ra vano, “heqê to yê definbîyişî zî çîn yo”. Gere îqtîdar Şarê Kurdî ra uzrê xo biwazo û nêy kerdeneyê bêexlaq û teber merdimayîyan ra, gamêke raver fek vera bido.
